La privatizacion e la mercandizacion dels elements vitals per l'umanitat e per la planeta, son, ara, mai fòrtas que non o son pas jamai estadas. Après l'espleitacion de las ressorças naturalas e del trabalh uman, aquel procès s'abriva e s'espandís a las coneissenças, a las culturas, a la santat, a l'educacion, a las comunicacions, al patrimòni genetic, al vivent e a sas modificacions. Lo benestar de totes e la preservacion de la Tèrra son sacrificats al profièch financièr a cort tèrme de qualques uns.

Las consequéncias d'aquel procès son nefastas. Son vesedoiras e conegudas de totes : patiment e mòrt de los que pòdon pas accedir als tractaments brevetats e que la recèrca orientada cap a un profièch comercial negligís, degalhament de l'environament e de la biodiversitat, rescaufament climatic, dependéncia alimentària dels estatjants dels païses paures, apauriment de la diversitat culturala, reduccion de l'accès a la coneissença e a l'educacion per l'establiment del sistèma de proprietat intellectuala sus la coneissença, impacte nefaste de la cultura consumerista.

Lo Forum Social Mondial de 2009, a Belem, Pará, al Brasil, se dabana en aquel moment particular que la globalizacion neoliberala, dominada per de mercats financièrs fòra de tot contraròtle public, fai espectaclosament fogassa. Se produsís tanben al moment qu'espelís una presa de consciéncia que i a de bens comuns que son de totes los èstres umans, e a la natura meteissa, que pòdon de ges de biais èstre privatisats o considerats coma de mèrças.

Aquela presa de consciéncia s'apièja sus una vesion de la societat que plaça lo respècte dels dreches umans, la participacion democratica e la cooperacion al còr de sas valors. Las iniciativas alternativas se desvolopan dins fòrça domenis per aparar l'aiga e los flumes, la tèrra, las semenças, la coneissença, la sciéncia, las seuvas, las mars, l'aura, las monedas, la comunicacion e las intercomunicacions, la cultura, la musica e las autras arts, las tecnologias dobèrtas e lo logicial liure, los servicis publics d'educacion, de santat, d'assaniment, la biodiversitat e las coneissenças ancestralas.

Los signataris del present Manifèst, mandat al Forum Social Mondial de 2009, cridan totes los ciutadans del mond e lors organizacions per que s'engatgen dins l'accion per la recuperacion e la mesa en comun dels bens de l'umanitat e de la planeta, presents e avenidors, per tal que lor gestion siá assumida dins un procediment participatiu e collaboratiu per las personas e las comunitats pertocadas e a l'escala de l'umanitat dins la perspectiva d'un mond sostenible.

Los signataris cridan totes los ciutadans del mond e lors organizacions per aprigondir la nocion de bens comuns, per partejar lors apròchis e lors experiéncias per la desprivatizacion e la desmercandizacion dels bens comuns de l'umanitat e de la planeta, per articular las luchas de lors pròprias organizacions, en renfortissent mutualament lors campanhas e lors iniciativas.




« Revirat amb l'adjuda tecnica de l'Institut d'Estudis Occitans »