La privatigo kaj la varigo de la vivesencaj elementoj por la homaro kaj por la planedo estas pli fortaj ol iam ajn. Post la ekspluatado de la naturaj rimedoj kaj de la homa laboro, tiu procezo plirapidiĝas kaj etendiĝas al la sciado, al la kulturoj, al la sano, al la edukado, al la komunikiloj, al la gena riĉeco, al la vivanteco kaj al ĝiaj modifoj. La bonstato de ĉiuj kaj la antaŭzorgo pri la planedo estas forŝakritaj kontraŭ la financa profito je mallonga templimo de kelkaj unuopuloj.

La sekvoj de tiu procezo estas ruinigaj. Ili estas videblaj kaj de ĉiuj konataj: sufero kaj morto por tiuj kiuj ne povas aliri al la patentitaj kuracaĵoj, por tiuj kiujn la esplorado, nur celante komercan profiton, flankenlasas, detruo de la naturo kaj de la biodiverseco, klimata varmiĝo, nutra dependo de la loĝantoj de la malriĉaj landoj, malriĉigo de la kultura diverseco, malpliigo de la aliro al la sciado kaj al la edukado pro elstarigo de la sistemo de intelekta proprieto pri sciado, ruinigaj sekvoj de la konsumema kulturo.

La Monda Socia Forumo de 2009, en Belem, Pará, Brazilio, precize okazas kiam la novliberala tutmondiĝo, regata de financaj merkatoj ekster iu ajn publika kontrolo, spektakle fiaskas. Ĝi ankaŭ okazas kiam ekaperas konsciiĝo ke estas havaĵoj kies uzo estas komuna al ĉiuj homoj kaj al la naturo mem, havaĵoj kiuj neniel povas esti privatigitaj aŭ konsiderataj kiel varoj.

Tiu konsciiĝo baziĝas sur ideo de la socio kiu metas la respekton de la homaj rajtoj, la demokratan partoprenon kaj la kooperadon en la kernon de siaj valoroj. La alternativaj iniciatoj disvolviĝas en multaj kampoj cele al defendo de la akvo kaj de la riveroj, de la tero, de la semoj, de la sciado, de la scienco, de la arbaroj, de la maroj, de la vento, de la monoj, de la komunikado kaj de la interkomunikadoj, de la kulturo, de la muziko kaj de la aliaj artoj, de la malfermaj teknologioj kaj de la libera programaro, de la publikaj servoj pri edukado, sano, salubrigo, de la biodiverseco kaj de la hereda sciado.

La subskribintoj de tiu ĉi Manifesto, lanĉita dum la Monda Socia Forumo de 2009, vokas al ĉiuj civitanoj de la mondo kaj al iliaj organizoj por ke ili engaĝiĝu en la ago por la rehavigo kaj la komuniĝo de la havaĵoj de la homaro kaj de la planedo, estantaj kaj estontaj, por ke ilia administrado estu farata baze de partoprena kaj kunlabora demarŝo fare de la koncernataj personoj kaj komunumoj, kaj homarskale cele al daŭripova mondo.

La subskribintoj vokas al ĉiuj civitanoj de la mondo kaj al iliaj organizoj por ke ili profundigu la koncepton de komunaj havaĵoj, por ke ili kumetu siajn alirojn kaj spertojn por la malprivatigo kaj malvarigo de la komunaj havaĵoj de la homaro kaj de la planedo kaj por ke ili organizu la luktojn de siaj propraj asocioj, plifortigante reciproke ties kampanjojn kaj iniciatojn.